Rossiya bosh vaziri innovatsiyalarga bag‘ishlangan tadbir vaqtida shoshilinch evakuatsiya qilindi

Rossiya bosh vaziri Dmitriy Medvedev ishtirokida Skolkovoda o‘tayotgan “Ochiq innovatsiyalar” forumi vaqtida qisqa tutashuv natijasida yuz bergan qasir-qusur ovozlari sabab tadbir to‘xtab qoldi. Bu haqda “Gazeta.ru” xabar bermoqda.

Muhokamalar vaqtida boshlovchi “xavfsizlik nuqtai nazaridan inshootni tark etishga chaqirdi”. Rossiya bosh vaziri ham o‘z delegatsiyasi bilan birga zalni tark etgan.

Forum ishtirokchilari Federal qo‘riqlash xizmati tashabbusi bilan evakuatsiya qilingan. Anjumanlar zalida kuyindi hidi tarqalgan.

Xavfsizlik xizmati xodimlarining ma’lum qilishicha, zal ustidagi gumbazda simlar tutab ketgan.

Anjumanda Medvedevdan tashqari, Rossiya bosh vaziri o‘rinbosari Arkadiy Dvorkovich, hukumat a’zolari va biznesmenlar ham ishtirok etayotgan edi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.