AQSh transport vazirligi Galaxy Note 7 smartfonlarini samolyotga olib kirishni taqiqladi

AQSh transport vazirligi yo‘lovchilarga Samsung Galaxy Note 7 smartfonlarini samolyot bortiga olib kirishni taqiqladi. Bu haqda vazirlikning matbuot xizmatiga tayanib, “RBK” xabar bermoqda.

Galaxy Note 7 smartfonini samolyot bortiga qo‘l yuki yoki maxsus topshiriladigan bagaj orqali olib kirish taqiqlandi. Aviakompaniya xodimi yo‘lovchida Galaxy Note 7 borligini aniqlasa, yo‘lovchiga samolyotga o‘tirish uchun ruxsat berilmaydi.

AQSh transport vazirligining qayd etishicha, yo‘lovchi qurilmadan qutulishi kerak. Yo‘lovchi havo kemasi bortiga jiddiy ko‘rikdan so‘ng, qo‘l yukini ko‘rsatgan holda chiqa oladi.

Agar bort ekipaji parvoz vaqtida yo‘lovchilardan birida Galaxy Note 7’ni aniqlasa, uning egasidan qurilmani o‘chirish so‘raladi va u olib qo‘yiladi. Ushbu holatda tartibbuzar jarimaga tortiladi. Galaxy Note 7’ni bagajga topshirgan yo‘lovchilar jarimadan tashqari jinoiy javobgarlikka tortilishi mumkin.

AQSh transport vazirligining taqiqi mahalliy reys hamda AQShdan uchib va mamlakatga kirib kelayotgan yo‘lovchilarga ta’sir qiladi. Taqiq aynan qaysi aviakompaniyalarga tegishli bo‘lishiga aniqlik kiritilmagan. Buyruq 15-oktabr kuni kuchga kiradi.

Samsung Galaxy Note 7 smartfonlari 7-avgustdan Janubiy Koreya bozorida chiqa boshlagan edi, ammo sentabrga kelib 2,5 million smartfon xaridorlardan qaytarib olindi. Bunga uskuna batareyasi bilan bog‘liq muammolar sabab bo‘ldi.

11-oktabr kuni Galaxy Note 7’ning ishlab chiqarilishi to‘xtatilgani e’lon qilindi. 13-oktabr kuni Samsung Electronics kompaniyasi Janubiy Koreyada Galaxy Note 7 smartfonlari uchun tovon puli to‘lash va ularni boshqa modellarga almashtirib berishni boshladi.

Samsung Galaxy Note 7 sotuvlari to‘xtatilganidan so‘ng daromad 30 foizga tushishini kutmoqda. Kompaniya Galaxy Note 7 tufayli ko‘riladigan zararni 5,3 milliard dollarga baholadi.