Oliy Liganing 3-raqamli to‘purari milliy terma jamoada 5 daqiqa imkoniyat berishsa, gol urishi haqida aytdi

O‘zbekiston Oliy Ligasi to‘purarlari reytigida uchinchi bo‘lib turgan hujumchi Shohruz Norxonovning “Lokomotiv”ga qarshi o‘yinda urgan golidan keyingi kichik intervyusi “Interfutbol” gazetasida chop etildi, deb yozdi “Championat.asia”.

Jurnalistning milliy terma jamoadan chaqiruv olgani borasidagi savoliga 1993-yilda tavallud topgan hujumchi shunday javob berdi: “Men uchun kutilmagan taklif bo‘ldi. Chunki Oliy Ligada ilk mavsumimni o‘tkazmoqdaman. Boz ustiga yetakchi klubda o‘ynamayapman. Bir vaqtlar o‘zim havas qilgan futbolchilar bilan birga mashg‘ulot o‘tkazganim xuddi ertakka o‘xshab ko‘rindi. O‘zimga bo‘lgan ishonchim ortdi”.

Musobaqa jadvalida so‘nggi o‘rinda borayotgan “Obod” hujumchisi Oliy Liganing 2016-yilgi mavsumida 13 ta gol urgan bo‘lib, bu borada uchinchi raqamli to‘purar bo‘lib turibdi. Undan oldinda “Lokomotiv” a’zosi Temurxo‘ja Abduxoliqov 16 ta, “Metallurg” hujumchisi Zohid Abdullayev 14 ta gol bilan bormoqda.

“Agar meni yana bir bor terma jamoaga taklif qilishsa va hech bo‘lmasa, besh daqiqa o‘ynash uchun imkon berishsa, o‘zimni ko‘rsataman. Ishonchni oqlab, raqib darvozasiga gol uraman. Hozir o‘yinga har qachongidan ham chanqoqman”, — deb fikr bildirdi Shohruz Norxonov.

Ma’lumot uchun, Norxonov terma jamoaning avvalgi yig‘inidan chaqiruv qog‘ozi olgan bo‘lsa-da, birorta o‘yinda ishtirok etmadi. Milliy terma jamoa bosh murabbiyi Samvel Babayan Oliy Liga to‘purari bo‘lib turgan yuqoridagi ikki hujumchiga ham imkoniyat bermagan.

Samvel Babayan Eron va Xitoyga qarshi o‘yinlar uchun tarkibni e’lon qilgan bo‘lib, unda Oliy Liga to‘purarlari ko‘rsatib o‘tilmagan.