Suriya armiyasi Isroil harbiy samolyoti va uchuvchisiz uchish qurilmasini urib tushirganini ma’lum qildi. Hodisa Isroil Suriya janubida mamlakat qo‘shinlari marralariga hujum uyushtirganidan so‘ng ro‘y bergani bildirilmoqda. Bu haqda “RBK” xabar berdi.
SANA agentligi samolyot 13-sentabr, seshanba kuniga o‘tar kechasi Isroil bilan chegaradagi Golan tepaliklarida joylashgan Al-Kuneytra shahrida o‘qqa tutilgani, natijada havo kemasi va dron urib tushirilganini ma’lum qildi.
Eslatib o‘tamiz, oldinroq Isroil aviatsiyasi Golan tepaliklarida Suriya hududidan uchirilgan snaryad portlaganidan so‘ng mazkur mamlakat hukumat kuchlari marralariga zarbalar berayotgani haqida xabar berilgandi.
