Suriya shimolidagi asosan kurdlar istiqomat qiladigan Al-Qamishli shahrida ikkita portlash yuz berdi. Dastlabki ma’lumotlarga ko‘ra, kamida 44 kishi halok bo‘ldi, 140 dan ortiq kishi jabrlandi. Bu haqda “Vedomosti” xabar bermoqda.

Qayd etilishicha, avtomobil va mototsiklga o‘rnatilgan bombalar ishga tushirildi. Portlash shaharning g‘arbida, Turkiya bilan chegaraga yaqin qismida sodir bo‘ldi. Portlash ovozlari Turkiya chegarasida joylashgan Nusaybin shahrida ham eshitildi. Ba’zi binolarning oynalari derazalardan chiqib ketdi.

Yevropada joylashgan “Inson huquqlari bo‘yicha Suriya observatoriyasi” muxolifat tashkilotining ma’lum qilishicha, portlashlarning asosiy maqsadi kurd politsiyasi mahkamasi va uning yaqinidagi ma’muriy binolar bo‘lgan.

Xabarda aytilishicha, IShID terrorchilik guruhi portlash uchun javobgarlikni o‘z zimmasiga oldi. Terrorchilik guruhi Amaq agentligi orqali kurd obyektlari teraktning asosiy maqsadi ekanini tasdiqladi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.