Krishtianu Ronaldu Uels darvozasiga gol urish uchun qancha balandlikka sakragani Yevropa nashrlarining bosh mavzusiga aylandi
Yevro—2016 yarim finalida Uels darvozasini ishg‘ol qilgan portugaliyalik Krishtianu Ronaldu kun qahramoniga aylanib ketdi. Uning to‘pga zarba berish uchun yerdan qancha masofaga ko‘tarilgani borasida Yevropa nashrlari birin-ketin o‘z tahminini chop eta boshladi.
“Championat.asia”ning Pasion Futbol nashriga asoslanib xabar berishicha, Ronaldu bosh bilan zarba berish uchun 2,88 metrga parvoz qilgan. Bunda manbaa Uels himoyachisi Jeyms Kollinzning bo‘yiga asoslanib, shundan kelib chiqqani holda Ronalduning sakrashini aniqlashga harakat qilgan.
Keyinroq La Gazzetta dello Sport va Marca nashrlari ham bu borada o‘z tahminiy o‘lchovini chop qildi. Ularning birinchisi 2,44 metr balandlikni ko‘rsatgan bo‘lsa, boshqasi 2,61 metr fikrini ilgari surgan.
Uels darvozasiga urilgan gol Krishtianu Ronaldu uchun Yevropa Chempionatlari tarixidagi to‘qqizinchisi bo‘lib, hujumchi fransiyalik Mishel Platinining rekordini takrorladi. Platini 1984+yilgi Yevropa chempionatida bir yo‘la 9 ta gol urgandi, Ronaldu esa buning uchun 4 ta Yevroda ishtirok etdi va 4 ta qit’a chempionatida gol urgan yagona futbolchiga aylanib oldi.
