Futbol bo‘yicha O‘zbekiston terma jamoasi katta murabbiyi Ravshan Haydarov milliy termaning JCh–2018 turniriga 3-saralashidagi raqibi hisoblangan Suriya terma jamoasining o‘yinini kuzatish uchun Vyetnamga uchib ketdi. Bu haqda O‘zbekiston futbol federatsiyasi matbuot xizmati xabar bermoqda.

Suriya terma jamoasi 31-may kuni Xanoy shahrida Vyetnam terma jamoasiga qarshi o‘rtoqlik uchrashuvida maydonga tushadi. Mazkur o‘yin Suriya terma jamoasi uchun saralash bahslaridan oldin tayyorgarlik vazifasini o‘tab beradi.

Bo‘lajak o‘yin O‘zbekiston milliy terma jamoasi murabbiylar shtabida katta qiziqish uyg‘otgan. Shu sababli, milliy terma jamoa katta murabbiyi Ravshan Haydarov raqib o‘yinini kuzatish va o‘rganish uchun Vyetnamga uchib ketgan. Mazkur safarda unga terma jamoa operatori Jamoliddin Solixov hamrohlik qiladi.

Qayd etish kerak, O‘zbekiston milliy terma jamoasi JCh–2018 saralashi “A” guruhi bahslarini 1-sentabr kuni Toshkentda, aynan Suriya terma jamoasiga qarshi o‘yin bilan boshlaydi.

• Suriya bilan boshlaymiz, Janubiy Koreya bilan tugatamiz. O‘zbekistonning JCh—2018 3-saralashidagi o‘yinlari taqvimi

Eslatib o‘tamiz, O‘zbekiston milliy terma jamoasi JCh–2018 3-saralashiga tayyorgarlik jarayonida 2-iyun kuni Toshkentda Ekvatorial Gvineya terma jamoasiga qarshi o‘rtoqlik uchrashuvida maydonga tushadi. Uchrashuv Toshkentdagi “Bunyodkor” stadionida bo‘lib o‘tadi.

• O‘zbekiston va Ekvatorial Gvineya o‘rtoqlik uchrashuvining chiptalari sotuvga chiqarildi

4-iyun kuni esa terma jamoa Avstriyaga jo‘nab ketadi va 7-iyun kuni Kanada milliy terma jamoasiga qarshi o‘rtoqlik uchrashuvini o‘tkazadi.