“Barselona” hujumchisi Neymar 9,1 million dollarga samolyot xarid qilgani oydinlashdi

Ispaniyaning “Barselona” klubi a’zosi Neymar 9,1 million dollarlik havo kemasini xarid qildi. Bu haqda “Chempionat” Globo Esporte nashriga asoslanib xabar berdi.

Manbaning keltirishicha, xarid 2015-yilning avgust oyida amalga oshirilgan. O‘shanda Neymar o‘z bortiga 12 yo‘lovchini sig‘dira oladigan hamda 890 km/s tezlikda harakatlana oladigan Cessna Citation 680 samolyotini sotib olgandi. Uning harajatlari Neymar Sport e Marketing firmasi mablag‘lari hisobidan qoplangan.

So‘nggi vaqtlarda Neymar Braziliya hamda Ispaniyada soliqlardan bo‘yin tovlash bilan bog‘liq bir necha mojaroga aralashib qolgan. Buning natijasida futbolchiga tegishli bo‘lgan mol-mulkning bir qismi musodara ham qilingan. Xususan, 2015-yil Braziliya sudi Neymarning 47 million dollarlik mol-mulkini xatlashga qaror qilgandi.