Apple kompaniyasi sudga murojaat qilib, unga Federal qidiruv byurosiga terrorchi Said Faruqning smartfoniga buzib kirishda yordam berish majburiyatini yuklagan qarorni bekor qilishni so‘radi, deb yozadi Meduza.
Arizada aytilishicha, ushbu talab Apple kompaniyasining AQSh Konstitutsiyasiga kiritilgan Birinchi tuzatish orqali kafolatlangan fikr bildirish uchun majburlanmaslik huquqini buzadi.
Apple’dagilar aytishicha, iPhone himoyasini buzib kirish imkonini beruvchi kod “jinoyatchilar, terrorchilar va xakerlar” uchun hujum obyektiga aylanadi.
Eslatib o‘tamiz, 16-fevral kuni AQSh sudi Apple korporatsiyasi Federal qidiruv byurosi xodimlariga “San-Bernardino mergani”ning telefonini buzib, undagi ma’lumotlarni olishda yordam berishi lozimligi haqida qaror qabul qildi. Sud qaroriga muvofiq, korporatsiya shu paytga qadar terrorchilardan biri Said Faruqning mobil uskunasi ma’lumotlariga buzib kira olmayotgan FQB xodimlariga maxsus dasturiy ta’minot taqdim etishi talab qilinadi. Korporatsiya rahbari Tim Kuk bunga javoban sud qaroriga rasmiy e’tiroz bildirilishini ta’kidlab o‘tgan edi.
Izoh (0)