AQShda avtomobil Mehnat kuniga bag‘ishlangan parad ishtirokchilarini urib ketdi

7-sentabr, dushanba kuni AQShning Illinoys shtati Uestvill shahrida Mehnat kuni (Labor Day) munosabati bilan uyushtirilgan parad ishtirokchilarini avtomobil urib ketdi, deya xabar bermoqda “TASS”.

Mahalliy hukumat vakillari ma’lum qilishicha, hodisa natijasida 11 kishi shikastlangan, ular orasida 2, 4, 10 va 13 yoshli bolalar ham bor.

Jabrlanganlarning barchasi ehtiyot yuzasidan kasalxonaga yotqizildi. Shifokorlar ularning hayoti xavf ostida emasligini aytdi.

Avtomobil haydovchisi, 61 yoshli ayol ham lat yedi. U nima uchun olomon orasiga avtomobil bilan bostirib borgani noma’lum, bunga sog‘lig‘iga aloqador muammo sabab bo‘lgan bo‘lishi mumkin. Politsiya hodisa yuzasidan tekshiruv boshladi.