Britaniyalik Tayson Fyurining baland bo‘yi super og‘ir vazndagi uchta yo‘nalish bo‘yicha jahon chempioni ukrainalik Vladimir Klichkoga bo‘lajak jangda muammo yaratishi mumkin. WBA versiyasi bo‘yicha “muntazam” jahon chempionligi kamari sohibi o‘zbekistonlik Ruslan Chagayev aynan shunday fikrda, deb xabar qiladi “TASS”.
Klichko va Fyuri o‘rtasidagi jang 24-oktabr kuni Dyusseldorfda bo‘lib o‘tadi.
“Superog‘ir vaznda hamma narsa bo‘lishi mumkin. Fyuri ancha baland (2 metr 6 santimetr — izoh. “TASS”) va uning jismoniy tomondan o‘ziga yarasha kuchli tomonlari bor, bu esa Klichkoga ba’zi noqulayliklarni yaratishi mumkin. Qo‘shimchasiga uning uslubi ham noodatiy. Ammo shularga qaramay, Klichko jangda g‘alaba qozonadi, deb o‘ylayman”, — deydi Ruslan Chagayev.
Eslatib o‘tamiz, professional boksning super og‘ir vazn toifasi WBA (Regular) yo‘nalishida jahon chempionlik kamarini o‘zida saqlab kelayotgan Ruslan Chagayev 11-iyul kuni o‘ziga tegishli bo‘lgan titulni munosib tarzda himoya qilgandi.
Izoh (0)