Aktyor Xyu Jekman va uning turmush o‘rtog‘i Deborra-Li Ferness shou-biznesdagi eng mustahkam juftliklardan biri hisoblanadi. “Vesti.ru”ning xabar berishicha, Jekmanning ayoli Avstraliya televideniyesi orqali efirga uzatiladigan Today Show dasturida qanday qilib nikohni mustahkam saqlab qola olganliklari haqida so‘zlab bergan.
Boshlovchi Liza Uilkinson shunday savol bilan murojaat qildi: “Turmush o‘rtog‘ingiz ekranda boshqa bir ayoldan bo‘sa olayotganiga qanday qaraysiz?”. Bunga Ferness hazil aralash javob berdi: “Men Xyuning agentiga erim Anjelina Joli bilan ishlashi mumkin emasligini aytganman”. Umuman, Fernessning so‘zlariga ko‘ra, Joli mehribon ayol va xayriya yo‘lida katta ishlar qilgan.
Fernessning so‘zlariga ko‘ra, aktyorning ishi shunaqa. “Lekin yoningda munosib inson bo‘lsa, barcha qiyinchiliklarni yengib o‘ta olasan”, — dedi u. Aktrisaning qo‘shimcha qilishicha, u hech qachon ikki haftadan ortiq eridan alohida yashamagan. Er-xotinlarning fikricha, aynan shu narsa ularning nikohini saqlab qolishga yordam bergan.
Aktyorlarning qayd etishicha, kasbiy faoliyat, albatta, ular uchun muhim. Lekin oila va xayriya faoliyati — muhimroq.
Xyu Jekman va Deborra-Li Ferness 1995-yili “Korrelli” serialini suratga olish vaqtida tanishgan, bir yildan so‘ng turmush qurgan. Aktyorlar o‘z farzandiga ega bo‘lolmagani sabab ota-onasiz qolgan bolalarni asrab olgan.
Izoh (0)