Gus Xiddink Gollandiya Qirollik futbol ittifoqi bilan shartnomani bekor qildi va mamlakat terma jamoasi bosh murabbiyligidan iste’fo berdi, deb xabar qiladi “Olamsport.com”.
Bor-yo‘g‘i bir yil bosh murabbiylik lavozimida ishlagan Gus 1-iyul kunidan rasman ishdan ketadi.
Eslatib o‘tamiz, Xiddink 2014-yili yozda Lui van Galdan Gollandiya terma jamoasini qabul qilib olgan edi. Aynan van Gal qo‘l ostida jamoa Braziliyadagi jahon chempionatida bronza medaliga sazovor bo‘lgandi. Lekin hamkasbi kabi ijobiy natijalarni qayd etish Xiddinkka nasib etmadi.
Uning qo‘l ostida 10 ta uchrashuvda maydonga tushgan Gollandiya bor-yo‘g‘i 4 ta o‘yinda g‘alaba qozondi. Ayni paytda gollandlar Yevro-2016 saralash guruh bosqichida peshqadam Islandiyadan 5 ochkoga ortda qolishyapti.
