Dunyo bo‘ylab sotilgan smartfonlar bo‘yicha Samsung o‘zining asosiy raqobatchisi Apple’dan o‘zib ketdi, deb xabar qiladi Strategy Analytics tahlil kompaniyasi.

Janubiy Koreya kompaniyasi joriy yilning birinchi choragida 83,2 millionta, Apple esa 61,2 millionta qurilma sotgan.

18,8 millionta smartfon sotgan Lenovo-Motorola kompaniyasi reytingning uchinchi pog‘onasini egalladi. Uning ortidan 17,3 million qurilma sotgan Xitoyning Huawei kompaniyasi bormoqda.

Tahlilchilar bergan ma’lumotga ko‘ra, 2015-yilning dastlabki uch oyi ichida jahon bo‘ylab 345 millionta smartfon sotilgan – bu o‘tgan yilning shu davriga nisbatan 21 foizga ko‘proq deganidir.

Oldinroq boshqa bir tadqiqot kompaniyasi Gartner ma’lumotiga ko‘ra, 2014-yilning 4-choragida Apple 74,8 millionta qurilma sotib, smartfon sotish bo‘yicha jahon bozorida yetakchiga aylanib olgani, 73 million smartfon sotgan Samsung esa ikkinchi o‘ringa tushib ketgani xabar qilingandi.

Ammo Strategy Analytics ma’lumotlariga ko‘ra, 2014-yilning so‘nggi uch oyi ichida Apple va Samsung bir xilda 74,5 milliontadan qurilma sotib, dunyoning eng ko‘p smartfon ishlab chiqaruvchi kompaniyasi nomini bo‘lib olgan.