Buxoroda yonib ketgan “Qamish bar” egasi yong‘in xavfsizligi bo‘yicha bir necha marta ogohlantirilgani ma’lum qilindi
22-aprel kuni Buxoro shahrida yonib ketgan “Qamish bar” restoranining egasi Nasullo Shirinov yong‘in xavfsizligi qoidalari buzilishi yuzasidan bir necha marta ogohlantirish olgan. Bu haqda Buxoro huquqni muhofaza qiluvchi organlariga tayanib “Vostochniy ekspress” xabar berdi.
Jumladan, yong‘in xavfsizligi xizmati xodimlari unga pechlarning nosozligi va oshxonada yong‘in o‘chirish uskunalari mavjud emasligini bir necha marta ma’lum qilgan. Ko‘plab qoidabuzarliklar oqibatida 2013-yil may oyida ham yong‘in kelib chiqqan, faqat bunchalik jiddiy bo‘lmagan.
Nasullo Shirinovga nisbatan yong‘in xavfsizligi qoidalarini buzish bo‘yicha jinoyat ishi qo‘zg‘atilgan bo‘lib, hozirda u qo‘lga olingan va tergovda bo‘lib turibdi. Uning aybi to‘liq isbotlansa, uch yilgacha ozodlikdan mahrum etilishi yoki eng kam ish haqining 20—50 baravari miqdorida jarimaga torilishi, besh yilgacha tadbirkorlik faoliyati bilan shug‘ullanish huquqidan mahrum etilishi yoki uch yilgacha axloq tuzatish ishlari kabi jazolardan biriga mahkum qilinishi mumkin.
