Ukraina hukumati Donbassda favqulodda holat joriy etdi

Ukraina Vazirlar Mahkamasi Donetsk va Lugansk viloyatlari hududida favqulodda holat joriy qilish to‘g‘risida qaror qabul qildi, deb ma’lum qiladi mamlakat bosh vaziri Arseniy Yatsenyuk. Bundan tashqari, hukumat butun mamlakat bo‘ylab favqulodda holatlarga yuqori tayyorgarlik rejimini joriy qildi. Bu haqda Interfax xabar berdi.

Yatsenyuk so‘zlariga ko‘ra, bu fuqarolar xavfsizligi va aholi fuqarolik muhofazasini ta’minlash uchun barcha hukumat organlarini to‘liq muvofiqlashtirish maqsadida qilingan.

Yatsenyuk hukumatning favqulodda holatlar bo‘yicha davlat komissiyasini tuzganligini ham ta’kidladi. Uning rahbari bosh vazir hisoblanib, uning o‘rinbosarlari – bosh vazir o‘rinbosari Gennadiy Zubko va favqulodda holatlar bo‘yicha davlat xizmati boshlig‘i Sergey Bochkovskiydir.

Ukraina hukumati favqulodda holatlar bo‘yicha hududiy muvofiqlashtiruvchi komissiya markazlari tashkil etish to‘g‘risida ham qaror qabul qildi. Bosh vazirning ta’kidlashicha, viloyat ma’muriyati tomonidan har bir viloyatda favqulodda holatlar bo‘yicha davlat komissiyasi bilan bir xil bo‘lgan tegishli favqulodda holatlar bo‘yicha hududiy komissiya tashkil etiladi.