O‘zbekiston Tashqi ishlar vazirligi vakillari Fransiyadagi terrorchilik hodisasi yuzasidan hamdardlik bildirdi

2015-yilning 9-yanvar kuni O‘zbekiston Respublikasi Tashqi ishlar vazirligi vakillari Fransiya Respublikasining Toshkent shahridagi Elchixonasiga tashrif buyurdi, deya xabar bermoqda vazirlik matbuot xizmati.

O‘zbekiston Respublikasi Tashqi ishlar vazirligi nomidan Parij shahridagi 7-yanvar terroristik hodisasi qurbonlariga mamlakatda 3 kunlik motam e’lon qilinganligi munosabati bilan ochilgan Hamdardlik kitobiga qayd kiritildi.

Eslatib o‘tamiz, Charlie Hebdo satirik haftanomasining Parij shahridagi tahririyatiga 7-yanvar kuni uyushtirilgan hujum oqibatida 12 kishi halok bo‘lib, 11 kishi jarohat olgan edi.