Samarqand viloyati Kattaqo‘rg‘on tumanida 21 ta yangi Isuzu avtobusi 2 yo‘nalishda harakatlana boshladi
Samarqand viloyati Kattaqo‘rg‘on tumanida 21 ta avtobus xarid qilinishi 30 dan ortiq ish o‘rni yaratish imkonini berdi, deb xabar qilmoqda O‘zbekiston avtomobil va daryo transport agentligi.
Samarqand viloyatida avtotransport korxonalari o‘z avtomobillar parkini muntazam ravishda yangilamoqda. Joriy yilning noyabr—dekabr oylarida Kattaqo‘rg‘on tumanidagi ikki avtokorxona jami 21 ta yangi Isuzu NP 37 avtobusiga ega bo‘ldi.
Xususan, tuman markazidagi ichki yo‘nalishlarda yo‘lovchi tashish bilan shug‘ullanuvchi “Kattaqo‘rg‘on Miyonkol” mas’uliyati cheklangan jamiyati bank kreditlari hisobiga 15 dona avtobus xarid qildi. Yangi avtotransport vositalari hozirda 306-raqamli “Kattaqo‘rg‘on ABB — Payshanba qo‘rg‘oni” shahar atrofi yo‘nalishida aholiga sifatli xizmat ko‘rsatmoqda.
15 dona avtobus sotib olinishi natijasida korxonada 20 dan ortiq yangi ish o‘rinlari yaratildi.
Yana oltita Isuzu NP 37 tuman ichki yo‘llarida xizmat ko‘rsatuvchi “Sardor Nor trans servis” mas’uliyati cheklangan jamiyati tomonidan xarid qilindi. Bugungi kunda avtobuslar qaytadan ishga tushirilgan 202-raqamli “Kattaqo‘rg‘on ABB — Mirbozor” yo‘nalishida aholining uzog‘ini yaqin qilmoqda.
Yangi avtobuslar keltirilishi munosabati bilan korxonada 10 dan ziyod ish o‘rinlari tashkil qilindi.
