O‘zbekistonlik shaxmatchi Sarvinoz Qurbonboyeva xalqaro turnirning 3-turida durang natija qayd etdi

BAAning Sharja shahrida “Musulmon davlatlari” o‘rtasida shaxmat bo‘yicha xalqaro turnir davom etmoqda. Ushbu musobaqada O‘zbekiston terma jamoasining ikki a’zosi ham o‘z imkoniyatini sinovdan o‘tkazmoqda, deb xabar berdi “Olamsport”.

Ayol shaxmatchilar o‘rtasidagi bahslarda Sarvinoz Qurbonboyeva, erkaklar musobaqasida Aleksey Barsov O‘zbekiston sharafini himoya qilmoqda. Ayollar guruhida 18 ta davlatdan 26 nafar ishtirokchi o‘zaro dona surmoqda. Erkaklar guruhida esa 46 nafar qatnashchi g‘oliblik yo‘lida bahslashmoqda.

Ushbu turnir to‘qqiz turdan iborat bo‘lib, bugungacha uchta partiya o‘ynaldi. Turnir g‘olibi erkaklar o‘rtasida besh, ayollarda esa uch ming AQSh dollariga ega bo‘ladi. Kecha 3-turda Qurbonboyeva qora donalarda qozog‘istonlik grossmeyster Dinara Saduakassova bilan durang o‘ynadi. Bundan avvalgi ikki turda Sarvinoz raqibalarini mag‘lub etgan edi. Barsov esa qora donalarda Eltaj Safarliga imkoniyatni boy berib qo‘ydi.