Oq uy hududiga ruxsatsiz kirishga yana bir kishi urinib ko‘rdi

AQShda noma’lum shaxs tomonidan prezident qarorgohi − Oq uy hududiga shimol tomondan ruxsatsiz kirishga urinish to‘xtatib qolindi, deb xabar bermoqda “TASS”.

Qoidabuzarga dastlab qo‘riqchi itlar hujum qilgan, keyin esa soqchilar tomonidan qo‘lga olingan. Prezident xavfsizligiga mas’ul AQSh Maxfiy xizmati vakili Brayan Lirining ma’lum qilishicha, qonunbuzar 23 yoshli AQSh fuqarosi Dominik Adesanya bo‘lgan. U Merilend shtatida, Vashingtondan uzoq bo‘lmagan Bel-Er aholi punktida yashagan. Uning yonida qurol bo‘lmagan.

Itlardan ajratib olingan Adesanya tibbiy yordam ko‘rsatilishiga muhtoj bo‘lgan. Qo‘riqchi itlardan ikkitasini esa veterinarga ko‘rsatishga to‘g‘ri kelgan. Bu so‘nggi oylar ichida Oq uy hududiga kirib olishga ikkinchi urinish bo‘lib, birinchisi oqibatida AQSh Maxfiy xizmati rahbari Juliya Pirson iste’foga chiqqan edi.