Ottavada 22-oktabr, chorshanba kuni shahar markazida otishmalar uyushtirgan yovuz niyatli kishilarni qidirish bo‘yicha maxsus operatsiya davom etmoqda, deb yozadi Euronews.
Hodisalar Birinchi jahon urushida halok bo‘lgan kanadaliklarga bag‘ishlangan me’moriy yodgorlik yonida hamda parlament tepaligida sodir bo‘lgan.
Noma’lum shaxs yodgorlik yaqinida faxriy qorovul askarlarga qarata o‘t ochganidan so‘ng maxsus operatsiya boshlanib ketdi. Hujum natijasida askarlardan birini o‘ldirgach, jinoyatchi parlament binosi majmuasi hududiga kirib olishga muvaffaq bo‘lgan.
Maxsus operatsiyalar davomida bir nafar gumonlanuvchi otib tashlandi. Ma’lumotlarga ko‘ra, u Kanadaning islom dinini qabul qilgan fuqarosi Maykl Zehaf-Bibo bo‘lgan.
Ayni paytda maxsus operatsiya davom etmoqda.
Eslatib o‘tamiz, ushbu hodisadan bir kun avval Kanada ichki terrorchilik tahdidi past darajadan o‘rta darajaga chiqqanini e’lon qilgan edi. Bu yaqinda kanadalik harbiylarga hujum qilingani bilan bog‘liqdir. 20-oktabr kuni Kanadaning Kvebek provinsiyasidagi Sen-Jan-syur-Rishelye shahrida 25 yoshli Martin Rulyo o‘z mashinasi bilan mamlakat qurolli kuchlarining ikki harbiy xodimini urib ketgan va qochish jarayonida avtomobili ag‘darilib ketgan. U politsiya bilan otishma chog‘ida halok bo‘lgan. Keyinroq jabrlangan harbiylardan biri shifoxonada hayotdan ko‘z yumgan.
Izoh (0)