Italiya Rossiyaga qarshi sanksiyalarni qayta ko‘rib chiqish masalasini ko‘targan yagona “Katta yettilik” davlati bo‘ldi

Italiya “Katta yettilik”dagi Rossiyaga qarshi sanksiyalarni qayta ko‘rib chiqish masalasini ko‘targan yagona davlat bo‘ldi, deya xabar bermoqda Financial Times YeIning yuqori lavozimdagi mansabdorlariga tayanib.

Shu oyda kiritilgan yangi sanksiyalar 30-sentabr, seshanba kuni Yevropa ittifoqi davlatlari elchilari tomonidan “o‘zgartirish, to‘xtatib turish yoki bekor qilish” maqsadida qayta ko‘rib chiqiladi.

Biroq, YeI mansabdorlari ta’kidlaganidek, cheklovchi choralar to‘xtatilishi yoki o‘zgartirilishi belgilari yo‘q.

“Aytish kerakki, oy davomida ba’zi ijobiy o‘zgarishlar, oldinga siljishlar ro‘y berdi, — deya ta’kidladi muzokaralarda qatnashadigan YeI mansabdori. — Biroq biz hamon uzoqdamiz. Rossiyaliklar haligacha Ukraina chegaralariga yaqin kelmoqda, ularga yordam bermoqda, ‘qonga qon’ siyosatini davom ettirmoqda”.