Qozog‘istonlik deputatlarga ijtimoiy tarmoqlar orqali “aholiga yaqinlashish” o‘rgatiladi

Qozog‘istondagi “Nur Otan” partiyasining siyosiy menejment maktabi mamlakat parlamentining quyi palatasi deputatlari uchun ijtimoiy tarmoqlardan foydalanish bo‘yicha kurslar tashkil qildi. Bu haqda ushbu maktab rahbari Asset Abdualiyevga asoslanib, Tengrinews.kz xabar bermoqda.

Ma’lum qilishlaricha, iyun oyi davomida 90 dan ortiq deputat ijtimoiy tarmoqlar va OAV bilan ishlash texnologiyalari bo‘yicha treninglardan qatnashadi. Tashkilotchilar ushbu seminarlardan so‘ng yanada ko‘proq deputatlar “internetga chiqadi, o‘zlari uchun yangi muloqot yo‘llarini topadi va aholi bilan yanada yaqinroq bo‘ladi”, deb umid qilmoqda.

“Kun”ning yozishicha, birinchi seminardan olingan fotosuratlarda parlament quyi palatasi raisi o‘rinbosari Sergey Dyachenko, Majlisning Xalqaro ishlar, mudofaa va xavfsizlik masalalari bo‘yicha qo‘mita raisi Maulen Ashimbayev va shu kabi bugungacha ijtimoiy tarmoqlarda faolligi sezilmagan boshqa deputatlarni ko‘rish mumkin.

Qayd etishlaricha, hozirgi vaqtda Baxit Sizdikov va Murat Abenov kabi parlamentariylar ijtimoiy tarmoqlardan faol foydalanib keladi, biroq ular endi deputat emas. Amaldagi deputatlar orasida Tanirbergen Berdongarov, Muxtar Tinikeyev va Serik Ospanov kabilar internetda nisbatan faol.