O‘zbekistonning birinchi raqamli tennischisi Denis Istomin Germaniyaning Dyusseldorf shahrida davom etayotgan turnirni g‘alaba bilan boshladi. Turnirning birinchi davrasida Istomin finlyandiyalik Yarkko Niyeminenga qarshi kortga chiqdi. Bu haqda “Olamsport” xabar berdi.
Yarkko musobaqaning oltinchi raketkasi bo‘lib, dunyo reytingida 51-o‘rinni egallab turibdi. Denis esa 57-pog‘onadan joy olgan. Bir soatu 57 daqiqa davom etgan bahsda Istomin raqibini uch set natijasiga ko‘ra taslim etdi. Dastlabki setni taybrekda boy bergan Denis keyinggi ikki setda kuchli raqibiga hech qanday imkoniyat qoldirmadi — 6:3, 6:2.
Endi Denis Istomin nimchorak final uchrashuvida italiyalik Alessandro Jannezi hamda avstraliyalik Jeyson Kubler bahsi g‘olibiga qarshi kortga chiqadi. Bu uchrashuv aslida kecha o‘tkazilgan bo‘lib, yakuniga yetmay qolgan edi. Dastlabki setni Kubler 7:5 hisobida yutib oldi. Ikkinchisida Jannezi muvozanatni tikladi — 6:3. Bugun hal qiluvchi uchinchi setda Denisning raqibi aniqlanadi.
Eslatib o‘tamiz, Dyusseldorf turnirining mukofot jamg‘armasi 485 ming 760 yevroni tashkil etadi. G‘olib tennischi o‘z hamyonini 77 ming 315 yevro hamda 250 reyting ochkosiga ega bo‘ladi.
Izoh (0)