Namangandagi “Barkamol avlod-2014” o‘yinlarida 50 shifokor va 70 oshpaz xizmatda bo‘ladi

Tez orada Namanganda “Barkamol avlod-2014” o‘yinlari boshlanadi. Tadbirga tayyorgarlik ishlari qizg‘in bormoqda, deya xabar berdi “Pravda Vostoka”.

Davlat sanitar-epidemiologik markazi viloyat bo‘limi boshlig‘i Gavhar Nishonovaning aytishicha, 17 ta tibbiy brigadalar tuzilgan bo‘lib, ular “Barkamol avlod” o‘yinlari davomida sport obyektlari, mehmonxona va yotoqxonalar, kafe va oshxonalarga biriktiriladi.

“Ishtirokchilar va mehmonlar yashash joylari, musobaqa o‘tadigan inshootlar, ovqatlanish obyektlarida zaruriy tayyorgarlik tadbirlari o‘tkazildi, — dedi u. — Bundan tashqari, tibbiy uskuna va preparatlar bilan ta’minlangan tibbiyot punktlari yaratilmoqda. Ellikdan ortiq shifokorlar sportchilarga xizmat ko‘rsatadi”.

Nashrning qo‘shimcha qilishicha, ovqatlanish xizmati shtabi tashkil qilingan, unga Namanganning 70 dan ziyod eng yaxshi oshpazlari jalb qilinadi.