“Kamolot” yoshlar ijtimoiy harakati markaziy kengashi tomonidan qator vazirlik va tashkilotlar hamkorligida Toshkent viloyatining Bo‘stonliq tumanidagi “Kamolot” yoshlar oromgohida “Kino va yoshlar” respublika forumi tashkil etildi, deb xabar berdi O‘zA.
Unda “O‘zbekkino” milliy agentligi qoshidagi badiiy kengash a’zolari, madaniyat va san’at arboblari,kinorejissyorlar, aktyorlar, dramaturglar, kinoshunos olimlar, “Kamolot” yoshlar ijtimoiy harakati boshlang‘ich tashkilotlari faollari, talaba-yoshlar ishtirok etdi.
Forum doirasida mavzuga doir qiziqarli savol-javoblar, bahs-munozaralar bo‘ldi. Adabiy ssenariy – kino san’ati asosi, kinodebyut – dastlabki qadam, qisqa metrajli kino, zamonaviy bolalar kinosi kabi qator dolzarb mavzularda mutaxassislar va yoshlar o‘zbek milliy kinematografiyasining bugungi holati va istiqbollari xususida fikr almashdi.
Dramaturgiya va rejissurani rivojlantirish, kadrlarning bilim va malakasini oshirish, ularning tajriba almashishiga imkon yaratish, yosh ijodkorlar uchun mahorat saboqlari tashkil etish, ta’limda “Ustoz-shogird” an’anasini yo‘lga qo‘yish, zarur darslik, o‘quv qo‘llanmalari hamda metodik materiallar yaratish masalalari o‘rtaga tashlandi.
– Bolalarni mushohada yuritishga chorlaydigan, ongi va tafakkurini boyitadigan, qalbida vatanparvarlik, ezgulik, mehr-muhabbat tuyg‘ularini qaror toptiradigan asarlar ko‘proq yaratilishini davr talab qilmoqda,– deydi O‘zbekiston davlat san’at va madaniyat instituti talabasi Sirojiddin Rustamov.
Forum davomida keyingi yillarda yaratilgan bir qator badiiy va xujjatli filmlar namoyish etildi. Ushbu filmlar ijodkorlari bilan suhbatlarda yoshlar o‘zlarini qiziqtirgan savollarga javob oldi. Kino san’atining sehrli olami, film yaratilishi uchun asos bo‘lgan g‘oyaning san’at asariga aylanishigacha bo‘lgan jarayon haqida bilimini boyitdi.
Izoh (0)