2014-yilning 5-may kuni bahorgi Umra safariga borgan 171 nafar ziyoratchidan iborat so‘nggi guruh O‘zbekistonga qaytib keldi. Bu haqda O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mitaning rasmiy sayti xabar berdi.
Bahorgi umra ziyoratini 5 900 dan ziyod o‘zbekistonlik (Toshkent–Jidda–Toshkent yo‘nalishi bo‘yicha 31 ta reysda) ado etdi.
15-fevral kunidan 5-may kuniga qadar o‘zbekistonlik ziyoratchilarning Saudiya Arabistoni Podshohligiga umra safarlari tashkil etildi.Kuzatish va kutib olish tadbirlari Din ishlari bo‘yicha qo‘mita, O‘zbekiston musulmonlari idorasi hamda tegishli mutasaddi vazirlik va idoralar hamkorligida amalga oshirildi.
Saudiya Arabistonida havo haroratining yuqori darajada bo‘lishini inobatga olib, shifokorlar guruhi tomonidan ziyoratchilarning salomatligini saqlash maqsadida eslatma-tavsiyalar ishlab chiqilib, tegishli tushuntirish ishlari olib borildi.
Ziyorat 10 kunni (Madinada 3 kun, Makkada 6 kun, Jiddada 1 kun) tashkil etdi. Ziyoratchilarga mavsum davomida o‘zbekistonlik sakkiz nafar ishchi guruhi, 28 nafar shifokor va to‘rt nafar oshpaz xizmat ko‘rsatdi. Ziyoratchilarimizning 3 mahal ovqatlanishlari uchun qulayliklar yaratish maqsadida mehmonxonalarda oshxonalar tashkil etildi. Mehmonxonada kichik shifoxona faoliyat ko‘rsatdi.
Ishchi guruhi tomonidan ziyoratchilarni Haramga olib borish uchun avtobus harakati, adashganlarni topish uchun maxsus qidiruv guruhi, shuningdek, mehmonxonalarda uzluksiz navbatchilik tashkil etildi.
O‘zbekistonlik ziyoratchilar Madina shahrida Masjidi Nabaviy bilan yonma-yon joylashgan “Mavadda Nur” mehmonxonasi hamda Makka shahrida Haramdan 900 metr uzoqlikdagi “Nama Mavadda” mehmonxonalarida istiqomat qildi.
Ziyoratchilar uchun Saudiyadagi mehmonxonalarda sun’iy yo‘ldosh orqali O‘zbekiston televideniyesi dasturlarini tomosha qilish, Vatanimizda bo‘layotgan voqealardan xabardor bo‘lish imkoniyati yaratildi.
Eslatib o‘tamiz, bahorgi Umra mavsumi O‘zbekiston Respublikasi Prezidenti Farmoniga muvofiq tuzilgan “Haj” va “Umra” tadbirlarini tashkil etish va o‘tkazish masalalari bo‘yicha Jamoatchilik kengashining qarorlari va tavsiyalari asosida amalga oshirildi.
Joriy yilning 7-iyulidan 29-iyul kuniga qadar “Umra—2014” Ramazon oyi mavsumi tashkil etiladi. Unda 663 nafar o‘zbekistonlik ziyoratchining safarlarini tashkil etish rejalashtirilmoqda.
Izoh (0)