O‘zbekistonga tashrif buyurgan Malayziya Bosh vazirining o‘rinbosari, ta’lim vaziri Muhiddin bin Hoji Muhammad Yassin O‘zbekiston davlat jahon tillari universiteti professor-o‘qituvchilari va talaba-yoshlar bilan uchrashdi. Bu haqda O‘zA xabar berdi.

Uchrashuvda O‘zbekiston davlat jahon tillari universiteti bilan Malayziyaning Binari universiteti o‘rtasida hamkorlikka oid anglashuv memorandumi imzolandi.

Bugungi kunda O‘zbekiston davlat jahon tillari universiteti Malayziyaning qator ta’lim muassasalari, jumladan, Perlis va Sulton Idris universitetlari va Allians tibbiyot kolleji bilan faol hamkorlikni yo‘lga qo‘ygan.

Universitetda yigirmaga yaqin xorijiy til, jumladan, malay tili bo‘yicha saboq beriladi. Oliy o‘quv yurtida faoliyat yuritayotgan Malay tili markazi talabalarning ushbu tilni chuqur o‘zlashtirishida ko‘maklashish barobarida universitet bilan hamkorlikda qator madaniy tadbirlar, anjuman va seminarlar o‘tkazib keladi.

– O‘zbekiston bilan Malayziya o‘rtasidagi hamkorlik bugungi kunda iqtisodiyot, ta’lim va sayyohlik kabi sohalarda jadal ravnaq topmoqda, – dedi Muhiddin bin Hoji Muhammad Yassin. – Sayyohlik sohasidagi o‘zaro hamkorligimiz ulkan salohiyatga ega. Malayziyada O‘zbekistonni, xususan, Toshkent, Samarqand, Buxoro, Xiva kabi qadimiy shaharlarni ziyorat qilishni, mamlakatingizning jahon sivilizatsiyasiga qo‘shgan ulkan hissasini yaqindan o‘rganishni istovchilar juda ko‘p.