“Sport” telekanali “Chelsi”—“Atletiko” uchrashuvini musobaqaning translyatsiya huquqiga egalik qiluvchi kompaniya ogohlantirishi tufayli efirga uzatmadi

30-aprel kuni Yevropa Chempionlar ligasi yarim finalidan o‘rin olgan “Chelsi” hamda “Atletiko” klublari o‘rtasida javob o‘yini bo‘lib o‘tdi.

Ma’lum qilinganidek, “Sport” telekanali uchrashuvni jonli efirga uzatishi kerak edi. Bu o‘yin translyatsiya qilinishi haqida teledasturlarda va O‘zbekiston milliy teleradiokompaniyasi saytida ham xabar berilgan edi.

“Sport” telekanalidagi manbamiz ma’lumotiga ko‘ra, “Chelsi”—“Atletiko” uchrashuvini jonli efirga uzatmaganiga ushbu musobaqaning translyatsiya huquqiga egalik qiluvchi kompaniya da’vosi sabab bo‘lgan. 30-aprel kuni O‘zMTRKga ushbu kompaniyadan uchrashuvni translyatsiya qilmaslik haqida ogohlantirish xati kelgan. Shuni e’tiborga olib, O‘zMTRK rahbariyati uchrashuvni efirga uzatmaslikka qaror qilgan.

Ta’kidlash joiz, “Sport” telekanalidagi manbamiz ogohlantirish xatini yuborgan kompaniya nomini ma’lum qilmadi.

Shuningdek, manbamizning qo‘shimcha qilishicha, Yevropa Chempionlar ligasi finalidagi “Atletiko” va “Real” o‘rtasidagi uchrashuvni “Sport” telekanali tomonidan to‘g‘ridan-to‘g‘ri olib berilishi ham noma’lum bo‘lib qolmoqda. Bundan tashqari, avval rejalashtirilgan Yevropa ligasidagi o‘yinlar translyatsiyasi ham bekor qilingan.

Eslatib o‘tamiz, “Chelsi”—“Atletiko” uchrashuvida 1:3 hisobida “Atletiko” jamoasi g‘alaba qozondi.