“Paxtakor”—“Lokomotiv” uchrashuvida muxlislar Galaxy S4 yutib olishi mumkin

3-may, shanba kuni oliy liganing yettinchi tur uchrashuvlari bo‘lib o‘tadi. “Paxtakor” o‘sha kuni “Lokomotiv” bilan Toshkent derbisida maydonga tushadi. Bu haqda “Paxtakor” futbol klubi sayti xabar berdi.

Futbol ishqibozlari “Paxtakor”—“Lokomotiv” bahsiga tashrif buyurib, Sog‘lom bola yiliga bag‘ishlangan “Omadli muxlis” ijtimoiy aksiyasida ishtirok etish va turli esdalik sovg‘alarni yutib olish imkoniyatiga ega bo‘ladi. Chiptalarni xarid qilgan tomoshabin “Omadli muxlis” ijtimoiy aksiyasi ishtirokchisiga aylanadi. Stadionga tashrif buyurgan ishqibozlarda to‘rtta futbol to‘pi, to‘rtta sport kostyumi va Fitness House sog‘lomlashtirish majmuasiga abonement, Galaxy S4 uyali telefoni va zamonaviy noutbuk yutib olish imkoniyati yuzaga keladi. Shuningdek, o‘yin davomida stadionda turli salqin ichimliklar va oziq-ovqat mahsulotlari sotuvi yo‘lga qo‘yiladi. Chiptalarni “Paxtakor” markaziy stadioni kassalaridan xarid qilish mumkin. Chipta narxi 2000 so‘mni tashkil etadi.

Eslatib o‘tamiz, oltinchi turdan so‘ng “Paxtakor” 18 ochko bilan birinchi o‘rinda, “Lokomotiv” esa 14 ochko to‘plab, ikkinchi o‘rinda bormoqda.

“Paxtakor”—“Lokomotiv” uchrashuvi 3-may, shanba kuni “Paxtakor” markaziy stadionida soat 18:30 da boshlanadi.