Turkiya bosh vaziri Rajab Tayyib Erdo‘g‘on mamlakat parlamentida nutq so‘zlab, XX asr boshlarida arman millatiga qarshi amalga oshirilgan ommaviy qirg‘in natijasida halok bo‘lganlarning avlodlariga ilk bor hamdardlik bildirdi. Bu haqda Gazeta.ru nashri xabar berdi.
Ta’kidlash joiz, Erdo‘g‘onning mazkur nutqi to‘qqiz til, jumladan, sharqiy va g‘arbiy Armaniston xalqlari tillarida ham chop etilgan.
“Umid qilamanki, umumiy murakkab va betakror geografik mintaqada urf-odat va an’analari mushtarak bo‘lgan qadimiy xalqlar o‘z o‘tmishlari va yo‘qotishlariga birgalikda munosib tarzda baho berishga qodir. XX asr boshlaridagi ayanchli voqealar qurboniga aylangan arman millatiga oid insonlarning ruhi shod bo‘lsin. Ularning avlodlariga esa chuqur ta’ziya izhor etaman”, — dedi siyosatchi.
U o‘z nutqi davomida Usmonlilar imperiyasi hukmronlik qilgan so‘nggi yillar diniy va etnik kelib chiqishidan qat’iy nazar, turk, kurd, arab, arman va boshqa millionlab fuqarolar hayotida “achinarli voqealarga boy og‘ir davr” bo‘lganini e’tirof etgan.
Eslatib o‘tamiz, Turkiya va Armaniston o‘rtasidagi diplomatik munosabatlar to‘xtatilgan, davlatlar o‘rtasidagi chegara esa 1993-yilda yopib qo‘yilgan edi. Bunday xolatga avvalo Turkiyaning Qorabog‘ muammosi bo‘yicha Ozarbayjon pozitsiyasini qo‘llab-quvvatlaganligi hamda 1915-yilda Usmonlilar Imperiyasi tomonidan armanlarga qarshi uyushtirilgan genotsidning xalqaro miqyosda tan olinishiga Anqaraning bildirgan munosabati sabab bo‘lgan edi.
Izoh (0)