KXDRda Kim Chen Inning tug‘ishgan ammasi — o‘tgan yilning dekabrida qatl etilgan nufuzli siyosatchi Chan Son Txekning xotini tilga olingan axborot materiallari yo‘q qilinmoqda. Bu haqda Yaponiyaning “Radio-press” xizmatiga xabariga tayanib, “ITAR-TASS” ma’lum qildi.
O‘tgan yanvardan buyon mamlakat marhum yetakchisi Kim Chen Irning singlisi bo‘lmish Kim Gen Xi haqida hech qanday xabar berilmadi. Aprel oyida Pxenyan televideniyesi o‘tgan yili suratga olingan hujjatli filmni qayta namoyish etdi. Undan Kim Gen Xi ishtirokidagi kadrlar olib tashlangan.
Ushbu filmdan Pxenyan partiya tashkilotining sobiq rahbari Mun Gen Dok aks etgan kadrlar ham kesib tashlangan. U Chan Son Txekning yaqin kishisi bo‘lgani uchun jazolangan. Tokio va Seuldagi kuzatuvchilarning fikricha, mamlakat yetakchisining ammasi ham o‘zining barcha lavozimlaridan ayrilgan bo‘lishi kerak. Avvallari u Koreya Mehnat partiyasi Markaziy qo‘mitasining siyosiy byurosi a’zosi bo‘lgan.
Eslatib o‘tamiz, Kim Chen In o‘z pochchasining qatl etilganini Yangi yil murojaatida tilga olib o‘tgan. KXDR yetakchisi bunda, Mehnat partiyasining yaxlitligini buzuvchi fraksionerlardan qutilish kerakligini aytib o‘tgan. Uning ta’kidlashicha, pochchasining qatl etilishi xalqni jipslashtirishga yordam bergan.
Chan Son Txekni mamlakatda ikkinchi o‘rindagi shaxs, deb hisoblashardi. Kim Chen In mamlakatni mustaqil boshqara olmaydigan paytlarda pochchasi uning siyosiy murabbiyi hisoblangan. Rasman Chan Son Txekka davlat mablag‘larini ayollarga va giyohvandlik moddalariga ishlatish aybi qo‘yilgan, ammo buning haqqoniyligi ko‘pchilik ekspertlarda shubha uyg‘otgan. Bir taxminga ko‘ra, uning qatl etilishi sababi – mamlakatning siyosiy hayotiga ta’siri o‘ta kuchli bo‘lganligidir.
Izoh (0)