12-aprel kuni Toshkentda rasman taqdim etilgan Samsung Galaxy S5 smartfoni poytaxt savdo rastalarida paydo bo‘ldi. Bu haqda mobinfo.uz xabar berdi.
Poytaxtning “Fleshka” savdo majmuasida yangi smartfonni taxminan 2,4 million so‘mga xarid qilish mumkin. Taqqoslash uchun, Samsung Galaxy S4 1,3 million so‘mdan sotilmoqda. Majmua sotuvchilarining ma’lum qilishicha, Galaxy S5’ning ilk nusxalari 11-aprel kuniyoq bu yerda sotila boshlagan.
Galaxy S5 5,1 dyuymli Super AMOLED displeyi (1920×1080), Qualcomm Snapdragon 801 to‘rt yadroli protsessor, 2 Gb tezkor va 16/32 Gb ichki xotira bilan ta’minlangan. Kamerasi 16 megapiksellidir. Soatiga 2800 megaamperli akkumulyator smartfonni suhbat rejimida 21 soatgacha quvvat bilan ta’minlab turadi.
Yangi Samsung Galaxy S5 mukammalashgan kamera, ma’lumotlarni yuqori tezlikda yetkazish imkoniyati, keng qamrovli fitnes-dasturlar tanlovi va ishonchli himoyaga ega. Uning avvalgi Galaxy’lardan farqi 16 megapikselli kamera, S Health 3.0 xizmati (qadamo‘lchagich, parhez, jismoniy mashqlarni qayd etish va eng yangisi — puls datchigi), IP67 standartlari bo‘yicha himoya vositasi (chang, namlik, qum va hatto, suvdan ham himoyalangan), barmoq izlari biometrik skaneri va zamonaviy tashqi ko‘rinishga ega ekanligidadir.
Izoh (0)