2014-yil 11-aprel kuni Toshkent shahrida O‘zbekiston Respublikasi Oliy Majlisi Senatining o‘n to‘rtinchi yalpi majlisi o‘z ishini davom ettirdi. Bu haqda O‘zA xabar berdi.
Senatorlar yalpi majlisning ikkinchi kunini O‘zbekiston Respublikasi Hisob palatasining 2013-yildagi faoliyati to‘g‘risidagi hisobotini muhokama qilishdan boshladi. O‘zbekiston Respublikasi Hisob palatasining 2013-yildagi faoliyati Davlat rahbari tomonidan 2013-yil 18-yanvarda bo‘lib o‘tgan, 2012-yilda mamlakatimizni ijtimoiy-iqtisodiy rivojlantirish yakunlari hamda 2013-yilga mo‘ljallangan iqtisodiy dasturning eng muhim ustuvor yo‘nalishlariga bag‘ishlangan Vazirlar Mahkamasining majlisida belgilab berilgan vazifalar asosida amalga oshirilganligi qayd etildi. Hisobot yilida Hisob palatasi tomonidan mamlakatning turli vazirliklari va idoralarida 43 ta yo‘nalish bo‘yicha 252 ta obyektda nazorat tadbirlari o‘tkazildi.
Bundan tashqari, O‘zbekiston Respublikasi byudjetdan tashqari fondlarining Davlat byudjetida jamlanadigan mablag‘lari to‘liq shakllantirilishi, maqsadli va oqilona sarflanishi ustidan uzluksiz nazorat amalga oshirib borildi. Buning natijasida hisobot yilida davlat yoki xo‘jalik yurituvchi subyektlarning manfaatlariga yetkazilgan 70 milliard so‘mdan ko‘proq zararning o‘rni qoplanishiga erishildi.
Masalani muhokama qilish jarayonida senatorlar O‘zbekiston Respublikasi Hisob palatasining nazorat tadbirlarini kuchaytirish hamda ularning samaradorligini oshirish, moliyaviy huquqbuzarliklarni qisqartirish va kelgusida ularning oldini olish bo‘yicha zarur choralar ko‘rishga qaratilgan o‘z taklif va tavsiyalarini bildirdi.
Senatning ikki kunlik majlisida 16 ta masala, shu jumladan, 7 ta qonun ko‘rib chiqildi. Demokratik islohotlarni bosqichma-bosqich va izchil chuqurlashtirib borish, davlat hokimiyati tizimini modernizatsiyalash, fuqarolik jamiyatini shakllantirish ishida “O‘zbekiston Respublikasi Konstitutsiyasining ayrim moddalariga o‘zgartish va qo‘shimchalar kiritish to‘g‘risida (32, 78, 93, 98, 103 va 117-moddalariga)”gi hamda “Davlat hokimiyati va boshqaruvi organlari faoliyatining ochiqligi to‘g‘risida”gi qonunlarning qabul qilinganligi g‘oyat muhim ahamiyatga ega.
Senat tomonidan ko‘rib chiqilgan va ma’qullangan “Huquqbuzarliklar profilaktikasi to‘g‘risida”gi, yangi tahrirdagi “Aksiyadorlik jamiyatlari va aksiyadorlarning huquqlarini himoya qilish to‘g‘risida”gi qonunlarni va boshqa qonun hujjatlarini ro‘yobga chiqarish bozor islohotlarini, ijtimoiy-iqtisodiy islohotlarni yanada chuqurlashtirish, aholi turmush darajasini oshirish, mamlakatda xavfsizlikni, barqarorlikni va farovonlikni ta’minlashning muhim omili bo‘ladi.
Shu bilan O‘zbekiston Respublikasi Oliy Majlisi Senatining o‘n to‘rtinchi yalpi majlisi o‘z ishini tamomladi.
Izoh (0)