Xalqaro mehnat tashkiloti (XMT) O‘zbekistondagi paxta terimida bolalarning majburiy mehnati qo‘llanilmaganligini qayd etdi. Bu haqda O‘zbekiston Kasaba uyushmalari federatsiyasi ma’lumotiga tayanib UzDaily nashri xabar berdi.
2013-yilning 11-sentabridan 31-oktabrigacha bo‘lgan davrda XMT O‘zbekiston Kasaba uyushmalari federatsiyasi, Mehnat va aholini ijtimoiy muhofaza qilish vazirligi, Savdo-sanoat palatasi hamda O‘zbekiston Fermerlar uyushmasi mutaxassislari ishtirokida Muvofiqlashtiruvchi kengash rahbarligida paxta terimidagi bolalar mehnati bo‘yicha monitoring o‘tkazdi.
Ushbu monitoring xulosalariga ko‘ra, paxta terimida bolalarning majburiy mehnatidan foydalanilmaganligi aniqlandi.
Ushbu natijalarni mustahkamlash, shuningdek, bolalar mehnatidan foydalanish ishlariga qarshi kelajakdagi ijtimoiy hamkorlikni rivojlantirish maqsadida Muvofiqlashtiruvchi kengash tomonidan XMT Konvensiyasida belgilangan bu boradagi dasturlarni amalga oshirish bo‘yicha bir qator rejalar ishlab chiqildi.
Jumladan, Muvofiqlashtiruvchi kengash tashabbusi bilan endilikda Davlat boshqaruvi akademiyasidagi viloyat, tuman, shahar hokimlari o‘rinbosarlarining o‘quv dasturlariga XMT konvensiyasining talablarini chuqurroq o‘rganish va ularni O‘zbekiston sharoitida amalga oshirishning mexanizmini ishlab chiqish kabi mashg‘ulotlar kiritiladi.
Shuningdek, bunday mashg‘ulotlar vazirlik, idoralar, jamoat tashkilotlari xodimlari, ish beruvchi va fermerlarning ilmiy salohiyati hamda malakasini oshirishga qaratilgan dasturlarga ham kiritiladi. O‘zbekiston Kasaba uyushmalari federatsiyasi tomonidan XMTning Konvensiyasi bo‘yicha hisobot, metodik qo‘llanmalar va ularni amalga tadbiq qilish bo‘yicha maslahatlar ishlab chiqiladi.
Izoh (0)