AQShning Pensilvaniya shtatidagi Filadelfiya shahrida ikki yashar bola o‘zining o‘n bir yoshli opasini to‘pponchadan otib qo‘ydi. Bu haqda 6-aprel kuni shahar politsiyasi vakillari xabar berishdi, deb yozadi “ITAR-TASS”.
Xabarga ko‘ra, bola o‘qlangan to‘pponchani ota-onasining yotoqxonasidan topib olgan va opasini otgan. O‘q qizning ko‘kragiga tekkan; uni kasalxonaga eltishgan, ammo jonini saqlab qolishning iloji bo‘lmagan.
Politsiyachilarning aytishlaricha, bu paytda bolalarning onasi uyda bo‘lgan, ammo o‘z yumushlari bilan narigi xonaga chiqqan. Bolalar qarovsiz qoldirilgan bir necha daqiqa ichida shu fojia yuz bergan.
Keyinchalik aniqlanishicha, uyga to‘pponchani shu xonadonning do‘sti keltirgan bo‘lgan.
Hozircha bu ish bo‘yicha hech kimga ayblov e’lon qilinmagan. Mahalliy ommaviy axborot vositalarining ta’kidlashlaricha, qizning o‘limini baxtsiz hodisa sifatida qayd etishlari mumkin.
