Jizzax shahrida ba’zi internet-kafelarning faqat tijorat maqsadini ko‘zlab, bolalar tarbiyasini e’tibordan qochirayotgani jamoatchilik e’tiroziga sabab bo‘lmoqda. O‘zAning ma’lum qilishicha, bolalarning yoshi va milliy qadriyatlarga to‘g‘ri kelmaydigan kompyuter o‘yinlari o‘ynashga yo‘l qo‘yilayotgan holatlar aniqlanib, tegishli choralar ko‘rilmoqda.
Xabarda kompyuter o‘yinlarining milliy qadriyatlarga mos kelish-kelmasligi qanday aniqlanayotgani, shuningdek, mos kelmaydigan o‘yinlarni taqdim etayotgan muassasalarga nisbatan aynan kim tomonidan qanday choralar ko‘rilayotganiga aniqlik kiritilmagan, deb yozadi “Kun” nashri.
“Axborot-kommunikatsiya texnologiyalari rivojlangan bugungi davrda bolalarning internetga kirishini cheklab bo‘lmagani kabi ularning nimani o‘rganayotganini ham to‘liq nazorat qilish oson emas. Yoshlarni internet tarmog‘i orqali kirib kelayotgan buzg‘unchi g‘oyalardan, ‘ommaviy madaniyat’ ta’siridan himoya qilishning to‘g‘ri yo‘li ularning internet savodxonligini oshirish, ijtimoiy hayotdagi o‘rni haqidagi tushunchalarni boyitishdir”, – deb yozadi O‘zA.
Jizzax shahridagi “Olmazor” mahalla fuqarolar yig‘ini raisi Norbuvi Shamshiyevaning so‘zlariga ko‘ra, ayni paytda hududdagi bitta internet-kafe va bitta kompyuter o‘yinlari shoxobchasi faoliyati o‘rganilib, ularni o‘quvchilarning bo‘sh vaqtini yanada mazmunli o‘tkazadigan maskanga aylantirish yuzasidan takliflar berilgan.
Izoh (0)