AQSh Kongressining vakillar palatasi 1-aprel kuni Ukrainaga yordam ko‘rsatish to‘g‘risida qonun qabul qildi. Hujjatda, xususan, Kiyev hukumatiga 1 milliard dollar miqdorida kredit hamda 150 million dollar miqdorida yordam ajratish nazarda tutilgan, deb yozadi “ITAR-TASS”.
Bundan tashqari, qonun AQSh hukumatiga Qrimni qo‘shib olganligi uchun Rossiyaga nisbatan sanksiya joriy etish imkonini ochib beradi. Unga ko‘ra, Ukrainada inson huquqlari hamda uning mustaqilligi buzilishiga daxldor bo‘lgan Rossiya va Ukraina fuqarolariga vizalar berishga taqiq qo‘yish va ularning bank hisoblarini muzlatib qo‘yish mumkin.
Qonun loyihasi ko‘pchilik ovoz bilan qabul qilindi: uni ma’qullab 378 nafar kongressmen ovoz berdi. Atigi 34 nafar kongressmen unga qarshi ovoz berdi, deb yozadi Reuters.
Avvalroq qonun loyihasi yuqori palata – senat tomonidan tasdiqlangan edi. Endi uni prezident imzolashi uchun hujjat Oq uyga yuboriladi.
Izoh (0)