Буюк Британияда 7 ёшли болада инсульт юз берганини ChatGPT аниқлай олди. Бу ҳақда Меtro’га таяниб “Zakon.kz” хабар берди.
Воқеа 2026 йил май ойида юз берган. Британиялик аёлнинг 7 ёшли ўғли сузиш вақтида танасининг чап томонида увишиш, “чумоли юргандек” ҳис ва ҳолсизлик борлигини айтган.
Шундан сўнг она ChatGPT’дан бу аломатлар нимадан келиб чиқиши мумкинлигини сўраган. Сунъий интеллект инсульт эҳтимолини кўрсатиб, болани шифокорга олиб боришни тавсия қилган.
Она болани шифохонага олиб борган. Бироқ кўрикдан сўнг шифокорлар уни уйига жўнатган.
Кейинги ҳафталарда боланинг аҳволи ёмонлашган. 25 июнь куни у кўнгли айниб уйғонган, алаҳсирай бошлаган, атрофдагиларга жавоб бермаган ва деярли ҳаракатлана олмаган.
“Болам уйғониб, ўзини ёмон ҳис қилаётганини айтди, кейин бир неча марта қайт қилди. У жуда гангиб қолган эди: куларди, юра олмасди, гавдасини тутиб туролмасди, кўзлари юмилган эди. У гапларимга умуман жавоб бермасди”, дейди боланинг онаси.
Унинг сўзларига кўра, бола тинмай сўлак оқизган. Дастлаб она ўғлининг аҳволи ёмонлашганини Буюк Британияда кузатилган кучли иссиқ ҳаво билан боғлаган. Ўша куни ҳаво ҳарорати 38 даражагача кўтарилган.
“Ҳарорат 38 даража бўлган куни ҳаммаси иссиқ туфайли бўлиши мумкин, деб ўйлагандим”, деди у.
Бироқ боланинг шифохонада аҳволи жуда оғирлашган. Онасининг айтишича, унда тиришишга ўхшаш белгилар кузатилган ва бола оғриқдан қичқирган. Шундан кейингина яқинларининг қатъий талаби билан унга тўлиқ тиббий текширув ўтказилган.
Текширув натижасида мия артерияларидан бири тўсилиб қолгани ва бу ишемик инсультга сабаб бўлгани аниқланган.
Бола зудлик билан ихтисослаштирилган клиникага олиб кетилган ва уч ҳафта давомида сунъий кома ҳолатида сақланган. Шифокорлар унинг соғайиши эҳтимолини жуда паст баҳолаган. Энг яхши ҳолатда бола ўнг қўли билан тугма тақа олиш даражасида тикланиши мумкинлиги айтилган.
Шунга қарамай, 11 август куни бола шифохонадан чиқарилган. Ҳозир у юриш ва гапиришни қайтадан ўрганмоқда. Бироқ мияга етган зарар унинг ривожланишида жиддий ортга кетишга олиб келган. Ҳозирда онаси унинг реабилитацияси билан шуғулланмоқда.
Шифохоналар бирлашмаси вакили оиладан расман узр сўраган ва шифокорлар инсультни дастлабки босқичда нима сабабдан аниқлай олмаганини ўрганиш учун ички текширув бошланганини маълум қилган.
Аввалроқ Хитойда фермер сунъий интеллект тавсиясига амал қилиб, қарийб 10 гектар майдондаги кунжут ҳосилини тасодифан йўқ қилиб юборган эди. Анхой провинциясида яшовчи 67 ёшли фермер тахминан бир йилдан бери сунъий интеллект (СИ) дан фойдаланиб келган. У экин экиш ва ўғитлаш муддатларидан тортиб пестицидлардан фойдаланишгача бўлган масалаларда СИдан маслаҳат олган.
