Шри Ланкада жарроҳлар эркак кишининг қовуғидан туяқуш тухуми катталигидаги тошни олиб ташлашди. Улар буни тиббиёт тарихида қайд этилган энг йирик тошлардан бири деб ҳисобламоқда. Бу ҳақда The Independent хабар берди.
Ўтган ҳафтада Тринкомали тумани касалхонаси шифокорлари инсультдан сўнг даволанаётган 55 ёшли бемордан оғирлиги 3,1 килограмм бўлган қовуқ тошини олиб ташлади. Маълум қилинишича, бемор шифохонага тахминан бир ой олдин ётқизилган. Бироқ даволаниш жараёнида шифокорлар унда пешоб чиқариш қийинлашганини пайқаган ва қўшимча текширувлар ўтказилган.
Операцияга раҳбарлик қилган уролог Прагаладхан Балакришнан қовуқ тоши янги туғилган чақалоқдек оғир ва туяқуш тухумидек катта бўлганини айтди. Унинг таъкидлашича, беморнинг саломатлиги жуда яхши ва у бошқа хасталиклари бўйича шифохонада даволанишни давом эттирмоқда.
“Бу муваффақият аҳил жамоавий меҳнат натижасидир. Дастлабки текширувлар беморда улкан қовуқ тоши борлигини кўрсатди. Шундан сўнг ҳолат мутахассислар жамоамизга йўналтирилди. Барча зарур оператив амалиётлардан сўнг тошни беморнинг қовуғидан муваффақиятли олиб ташладик”, деди доcтор Балакришнан.
Унинг қўшимча қилишича, бу жарроҳлик йўли билан олиб ташланган, ва ҳужжатлаштирилган энг катта қовуқ тошидир. Шифохона директори Сандамали Самаракуннинг сўзларига кўра, тош жарроҳлик йўли билан олиб ташланган энг катта қовуқ тоши сифатида Гиннеснинг рекордлар китобига кириши мумкин.
Гиннеснинг рекордлар китобида қайд этилган энг катта қовуқ тоши 2003-йилда Бразилиядаги бемордан олиб ташланган бўлиб, унинг оғирлиги 1,9 килограмм, ўлчами эса 17,9 сантиметр бўлган.
Қовуқ тошлари пешоб қовуқда узоқ ушланиб қолганда ҳосил бўлади. Оқибатда ундаги минераллар кристаллашиб, тошга айланади. Унинг кўп учрайдиган сабабларига простатит катталашиши, сийдик йўллари тўсилиши, асаб тизими билан боғлиқ қовуқ функцияси бузилиши, сурункали инфекциялар ва катетердан узоқ вақт фойдаланиш киради.
Кичик қовуқ тошлари ўз-ўзидан тушиб кетиши мумкин. Аммо ўлчами 1 сантиметрдан катта бўлган тошлар сийдик оқимини тўсиб қўяди ва даволанишни талаб қилади. Ўлчами 4 сантиметрдан ошган тошлар эса улкан қовуқ тошлари таснифига киради.
