АҚШ президенти Дональд Трамп ўз ҳарбийларининг огоҳлантиришларига қарамай, Эронга қарши қуруқликдан чекланган ҳужум уюштириш ҳақида буйруқ бериши мумкин. Бу ҳақда Покистон махсус хизматлари маълум қилди.
Исломободдаги хавфсизлик манбаларига кўра, ушбу хулоса ҳозирги ҳарбий кузатувларга асосланган. Экспертлар америкалик ҳарбийларнинг Эронга бостириб киришини жуда хавфли деб ҳисобламоқда. Чунки десант кучлари ракета ва дрон ҳужумларига дуч келиши тайин.
Шунингдек, мутахассислар Эронни “табиий қалъа” деб атамоқда. Тоғлар ва иссиқ чўллар қўшинларнинг илгарилашини жуда қийинлаштиради.
“Ноқулай ҳудуд ҳарбийларни бостириб кириш ҳақида икки марта ўйлаб кўришга мажбур қилиши керак”, дейилади АҚШ Ҳарбий-денгиз институти таҳлилида.
Институт бундай шароитда қуруқликдаги қўшинларнинг имкониятларини “имконсиз” деб баҳоламоқда. Техникалар, жумладан, танкларнинг тез ишдан чиқиши ҳам қўйилган мақсадларга эришишни қийинлаштиради.
Кучлар нисбати
Рақамлар ҳам Эрон режимининг устунлигини кўрсатмоқда. Теҳрон ихтиёрида 610 минг нафар амалдаги ҳарбий ва ҳарбийлаштирилган бирикмалар ҳамда 350 минг нафар захирадаги аскар бор. Қуруқликдаги операция АҚШ учун оқибати номаълум бўлган оғир синовга айланиши мумкин.
Бунинг устига Трамп ўз халқига ушбу операцияни тушунтириб бериши керак бўлади. Reuters ўтказган Ипсос сўровномасига кўра, АҚШ фуқароларининг бор-йўғи учдан бир қисми ҳарбий операцияни қўллаб-қувватламоқда. Респондентларнинг 69 фоизи Трамп ҳарбий аралашувдан кўзланган мақсадларни етарлича аниқ тушунтириб бермаган деб ҳисоблайди.
Музокаралар ва Эрон позицияси
Манбаларнинг билдиришича, Покистон ва Қатар Вашингтон ҳамда Теҳрон ўртасида таклифларни етказишда яна воситачилик қилмоқда. Бироқ Эрон вақтинча эмас, доимий оташкесим тузилишини талаб қилмоқда.
Шунингдек, Эрон ҳарбийлари АҚШни қуруқликдаги ҳужумдан огоҳлантирди. Теҳрон бундай операцияга тўлиқ тайёр эканини билдирди. Айни пайтда, Трамп 29 июль куни Иорданиядаги Америка ҳарбий базасига берилган ҳужумига жавобан АҚШ Эронга зарбалар беришни бошлашини айтди.
