Жанубий Корея апелляция суди 36 ҳафталик ҳомиладорлигини тугатган ва қотилликда айбланган аёлни оқлади. Бу ҳақда BBC хабар берди.
20 ёшли Квон фамилияли аёл 2024 йилда YouTube’да 8 ойлик ҳомиладорлигини тугатгани ҳақида видео жойлаган эди. Бу жамоатчилик ва Соғлиқни сақлаш вазирлигининг кескин эътирозига сабаб бўлди. Иш юзасидан суриштирув бошланди.
Прокурорлар чақалоқ кесарча кесиш амалиёти орқали тирик туғилгани ва кейинчалик музлатгичга солиб ўлдирилганини билдирди. 2026 йил март ойида биринчи суд аёлга 3 йиллик шартли қамоқ жазоси берганди. Операция қилган жарроҳ 4 йилга, шифохона директори эса 6 йилга озодликдан маҳрум этилганди.
Бироқ апелляция суди аёлни оқлади. Адвокатнинг таъкидлашича, воситачи аёлга бола ўлик туғилишини айтган ва у чақалоқ ўлдирилишини билмаган. Шунингдек, жарроҳнинг жазоси 2,5 йилга, шифохона директорининг жазоси эса 4 йилга қисқартирилди. Икки шифокор ҳам чақалоқни ўлдирганини тан олган.
Маълум бўлишича, аёл ҳомиладорлигини кеч — 7-ойда билиб қолган. У барқарор даромади йўқлиги ва ҳомиладорлик пайтида спиртли ичимлик ичиб, чеккани учун ҳомилани олдиришга қарор қилган.
Маълумот ўрнида, Жанубий Кореяда 2019 йилда аборт қилиш тақиқи бекор қилинган. Аммо парламент шу кунга қадар абортнинг аниқ муддатлари ва тартибини белгиловчи қонун қабул қилмаган. Бу ҳолат мамлакатда ҳуқуқий ноаниқликни келтириб чиқармоқда. Аввалроқ Австралияда бир йўлдошда тўрт эгизак дунёга келгани ҳақида хабар берилганди.
