Ўзбекистон кучли паспортлар рейтингида 123-ўринни эгаллади. Global Citizen Solutions компанияси Global Passport Index (GPI) 2026-йилги рейтингни эълон қилинди.
Дунёдаги энг кучли ўнта паспортдан тўққизтаси Европа давлатларига тегишли. Кучли ўнталикка киришга муваффақ бўлган ягона бошқа минтақа давлати 10-ўринни эгаллаган Сингапурдир.
Henley Passport Index фақат паспорт эгалари визасиз саёҳат қилиши мумкин бўлган мамлакатлар сонини инобатга олса, Global Passport Index давлатларнинг саёҳат қилиш имконияти, инвестициявий жозибадорлиги ва ҳаёт сифатини ҳам баҳолайди.
Марказий Осиё бўйича рейтинг
Минтақа мамлакатлари орасида Қозоғистон етакчилик қилмоқда (107-ўрин), кейинги ўринларни Ўзбекистон (123-ўрин), Қирғизистон (127-ўрин), Тожикистон (140-ўрин) ва Туркманистон (144-ўрин) эгаллаган. Афғонистон эса 197-ўрин билан рейтингни якунлаган. Ўзбекистон алоҳида индекслар бўйича мобилликда 129, инвестицияларда 89 ва ҳаёт сифати бўйича 119-ўринни қайд этган.
Дунёнинг энг кучли паспортлари
Рейтингда Швеция етакчилик қилмоқда: у мобиллик индекси бўйича 11-ўрин, инвестициялар бўйича тўққизинчи ва ҳаёт сифати бўйича иккинчи ўринда жойлашган.
Иккинчи ўринни Швейцария қайд этган, у мобиллик бўйича еттинчи, инвестициялар бўйича иккинчи ва ҳаёт сифати бўйича 36-ўринни эгаллайди.
Учинчи ўрин Финляндияга тегишли бўлиб, у мобиллик бўйича тўртинчи, инвестициялар бўйича 28-ўринда, аммо ҳаёт сифати бўйича биринчи ўринда бормоқда.
Германия мобиллик бўйича 15-ўринда, инвестициялар бўйича 20-ўринда ва ҳаёт сифати бўйича учинчи ўринда тургани сабабли тўртинчи поғонани эгаллаган. Етакчилар бешлигини Нидерландия ва Дания якунлаб берган. Кучли ўнталикка Ирландия, Буюк Британия, Норвегия ва Сингапур ҳам кирган.
Henley Passport Index бўйича Ўзбекистон рейтинги қандай эди?
2026 йил апрелда эълон қилган ушбу индексда Ўзбекистон 74-ўринга кўтарилганди. Йил бошида Ўзбекистон ушбу рўйхатда 75-поғонада бўлган. Ўшанда Қозоғистон паспорти минтақада етакчи бўлиб, 61-ўринни эгаллаган.
