Афғонистоннинг “Толибон” ҳаракати Покистон билан чегарадаги нишонларга зарбалар берди, Балужистон вилоятида бир неча киши жароҳатланди. Бу ҳақда BBC хабар берди.
Покистон ҳарбийлари тўртта дрон уриб туширилганини маълум қилди ва ҳар қандай кейинги провокацияга “муносиб жавоб қайтарилиши” ҳақида огоҳлантирди. BBC мазкур тўқнашувни мустақил равишда тасдиқлай олмади. Ушбу отишмалар Покистон 28 июнь куни Афғонистонга ҳаво зарбалари уюштирганидан сўнг содир бўлди. БМТ мазкур ҳужумларда 28 нафар тинч аҳоли ҳалок бўлганини маълум қилганди.
Покистон узоқ вақтдан бери Афғонистонни ўз тупроғида қўпорувчилик ҳаракатларини амалга оширувчи террорчиларга бошпана беришда айблаб келади, “Толибон” ҳукумати эса бу даъвони рад этмоқда. Афғонистон 28 июнь кунги ҳужумларда 36 нафар тинч аҳоли ҳалок бўлгани, 160 дан ортиқ киши жароҳатланганини эълон қилди.
“Толибон” мазкур ҳужумларни “қўрқоқларча амалга оширилган босқинчилик ҳаракати” деб баҳолади. Покистон ўша куни Афғонистоннинг Пактия, Пактика ва Кунар вилоятларига зарба бериб, 29 нафар жангарини йўқ қилганини маълум қилди.
Покистон буни “яқин орада содир этилган бир қанча террористик ҳодисалар”га жавоб деб атади. Жумладан, Карачи шаҳрида “Жамоат ул-Аҳрор” гуруҳи аъзолари Синд Рейнжерс объектига бомба ва қурол билан ҳужум уюштирди. Оқибатда уч нафар ҳарбий ҳалок бўлган, тўрт нафари яраланди.
Февраль ойида икки давлат ўртасидаги тўқнашувларда ўнлаб одамлар ҳалок бўлганди. Март ойида эса Покистоннинг Кобулдаги гиёҳвандларни реабилитация қилиш марказига берган зарбасида юзлаб одамлар ўлди. Июнь ойи бошида ҳам Покистон ҳаво ҳужумларини амалга оширди, 26 нафар жангари ҳалок бўлди. “Толибон” бу операцияларда 13 киши, асосан болалар ҳалок бўлганини маълум қилди.
