Жаҳон чемпионатида (ЖЧ) гуруҳ босқичи якунлангунига қадар ҳар куни олтитадан ўйин ўтказилиши режалаштирилган. Бу эса ўйинларни кузатишни худди тўлиқ ставкали асосий ишга айлантириб қўяди.
Шу сабабли ЖЧнинг 104 та ўйинини тўлиқ томоша қиладиган икки футбол мухлисининг ҳар бирига АҚШда 50 минг доллардан ҳақ тўланмоқда. Кевин Акото ва Остин Франклин ўйинларни Нью Йоркнинг Таймс-сквер майдони марказида жойлашган ойнали кабина ичидан туриб кузатмоқда.
Мазкур хона қулай креслолар, иккита катта экранли телевизор ва ҳатто стол футболи билан жиҳозланган. Шунингдек, мухлислар ўйинда қатнашаётган давлатларнинг миллий таомлари билан ҳам таъминланади.
“Бу худди ҳар қандай 20 ёшли йигитнинг тасаввуридаги жойга ўхшайди, агар футбол мухлиси сифатида бу ерга бирор нарса қўйиш имкони бўлганида, айнан мана шу нарсаларни танлаган бўлардингиз”, дейди Кевин BBC’га берган интервьюсида.
Флоридалик ошпаз Кевин ва филаделфиялик блогер Остин ушбу вазифа учун даъвогарлик қилган минглаб номзодлар орасидан танлаб олинган. Ўйин томоша қилишдан ташқари, улар бошқа футбол ишқибозлари учун контент ҳам яратиши зарур.
“Мен чарчадим, Остин ҳам бир оз чарчади, шунинг учун ҳамма нарсага мослашишни ўрганяпман”, дейди Кевин.
Улар иш вақти тугагач, дам олиш учун уйларига кетиши мумкин. Кевин олтин кубокни Испания қўлга киритишига ишонмоқда, гарчи ўз илдизлари сабабли АҚШ ва Ганага мухлислик қилади. Остин эса Норвегия терма жамоаси формасини кийиб олган. Бунга жамоанинг ва “Манчестер Сити” ҳужумчиси Эрлинг Ҳоланднинг ҳозиргача кўрсатаётган ўйинлари сабаб бўлган.
