Хитойнинг Гонконг шаҳрида ўтказилган жамоавий FIDE World Rapid and Blitz Team Chess Championships 2026 мусобақасининг блиц йўналишида Ўзбекистон терма жамоаси учинчи ўринни эгаллади.
Жорий йилнинг 17–21 июнь кунлари бўлиб ўтган ва дунёнинг энг кучли шахматчиларини жамлаган ушбу нуфузли мусобақада жами 53 та жамоа ғолиблик учун баҳс олиб борди. Турнирда Ўзбекистон шарафини гроссмейстерлар Нодирбек Абдусатторов, Жавоҳир Синдоров, Нодирбек Ёқуббоев, Шамсиддин Воҳидов, Муҳиддин Мадаминов ҳамда аёллар ўртасида халқаро гроссмейстерлар Афруза Ҳамдамова ва Умида Омонова, шунингдек, Оқжол Раҳматуллаевлар ҳимоя қилди.
Мусобақанинг блиц йўналиши плей-офф босқичига муваффақиятли йўлланма олган ўзбекистонлик шахматчилар чорак финалда WR Chess жамоасини мағлубиятга учратди. Ярим финалда эса Dragon Chilling жамоасига имконият бой берилди. Учинчи ўрин учун кечган ҳал қилувчи баҳсда Ўзбекистон вакиллари Hexamind Chess Team устидан ғалаба қозониб, бронза медалларига сазовор бўлди.
Мазкур натижа эвазига ўзбекистонлик шахматчилар 30 минг евро миқдоридаги пул мукофотини қўлга киритди. Маълумот учун, турнирнинг умумий мукофот жамғармаси 500 минг еврони ташкил этиб, шундан 310 минг евро рапид, 190 минг евро эса блиц йўналишлари учун ажратилган эди.
