Ўзбекистоннинг биринчи рақамли шахматчиси Нодирбек Абдусатторов дунёнинг энг нуфузли онлайн турнирларидан бири — Chess.com Open 2026 мусобақасидаги юришини чорак финал босқичида тўхтатди.
Мағлублар йўлаги орқали финал йўлланмаси учун дона сурган Нодирбек чорак финалда ҳиндистонлик Ниҳал Сарин билан тўқнаш келди. Афсуски, қизғин кечган баҳсда ўзбекистонлик шахматчи рақибига 2:0 ҳисобида имкониятни бой берди ва мусобақа билан хайрлашди.
Абдусатторов мазкур турнирни эронлик Сина Моваҳед билан биргаликда 5–6-ўринлар билан якунлади. Нодирбек ушбу натижа орқали 15 минг АҚШ доллари миқдоридаги мукофот пулини қўлга киритди.
NAVI жамоаси сафида иштирок этаётган Нодирбек Абдусатторов беларуслик Денис Лазавикка қарши баҳсда имкониятни бой бергани сабаб, курашни мағлублар йўлаги орқали давом эттирди. У иккинчи раундда россиялик Ян Непомняший устидан 1,5:0,5 ҳисобида ғалаба қозониб, учинчи босқичга йўл олди. Кейинги босқичда Абдусатторов ҳамюртимиз Жавоҳир Синдоровни мусобақадан чиқариб юборган франциялик Максим Ваше-Лаграв билан тўқнаш келди ва 1,5:0,5 ҳисобида устунликка эришди.
Эслатиб ўтамиз, ушбу турнир 2026-йилги Жаҳон чемпионати (Esports World Cup) учун саралаш вазифасини бажарар эди. Нодирбекдан олдин яна бир Ўзбекситон вакили — Жавоҳир Синдоров ҳам ўз иштирокини якунлаган эди. Синдоров армагеддон баҳсида Ваше-Лагравга имкониятни бой бериб, турнир билан эрта хайрлашишга мажбур бўлганди.
Маълумот учун, Нодирбек Абдусатторов ўтган йилги Esports World Cup турнирида 5-ўринни эгаллаб, 85 минг АҚШ доллари миқдоридаги мукофотни қўлга киритган эди.
