Россия июнь ойида денгиз орқали ёнилғи импорт қилишни бошлайди. Саноатдаги тўртта манбанинг сўзларига кўра, мамлакат нефтни қайта ишлаш заводларига қилинган йирик дрон ҳужумларидан кейинги бензин тақчиллигини шу йўл билан ҳал қилмоқчи. Дунёдаги энг йирик нефть ва нефть маҳсулотлари экспортчиси бўлган Россия учун бу кутилмаган ва камдан кам кузатиладиган ҳолатдир.
Манбаларнинг таъкидлашича, июнь ойида Россиянинг ғарбий портларидан бири орқали бензин партияси қабул қилинади. Ёнилғи Осиёдан етказиб берилади, бироқ унинг ҳажми ва етказиб берувчилар очиқланмади. Бошқа бир манбага кўра, Россия 2025-йилда ҳам денгиз орқали ёнилғи олиб киришни ўйлаган эди. Аммо у пайтда ички бозорнинг ўзида таъминот етарли бўлган.
2026-йилда эса Украинанинг Россия нефть заводлари, қувурлари ва ёнилғи омборларига қилган кўп ойлик дрон ҳужумлари сабабли таъминот чекланиб қолди. Украина шу орқали Москвани урушни молиялаштириш имкониятидан маҳрум қилмоқчи. Энг сўнгги ҳужумлар ТАNECО ва Москва нефтни қайта ишлаш заводларига уюштирилди. Оқибатда ҳар иккала заводда ҳам маҳсулот ишлаб чиқариш тўхтаб қолди.
Reuters агентлиги тўплаган маълумотларга кўра, Россиянинг ўнга яқин ҳудудида ёнилғи тақчиллиги кузатилаётгани ҳақида хабарлар тарқалган. Россия назоратидаги Қрим ҳамда Сибирнинг иккита вилояти ёнилғи етишмаслигини расман тасдиқлади. Шунингдек, ҳукумат июль ойи охиригача бензин экспортига тақиқ жорий қилди. Бу ёз ойларида аҳолининг ёнилғига бўлган юқори талабини қондириш учун ёрдам беради.
Москва тақчилликни ҳал қилиш учун қўшни Беларусдан ҳам ёнилғи импорт қилди. Аввалроқ Қозоғистондан ҳам кам миқдорда ёнилғи сотиб олишга ҳаракат қилган эди. Бироқ манбаларнинг қўшимча қилишича, агар чуқурроқ инқироз юзага келса, ҳар иккала давлатда ҳам Россияни қўллаб-қувватлаш учун етарли захира қуввати йўқ.
Манбалардан бирининг сўзларига кўра, денгиз орқали ёнилғи олиб кириш вақтинчалик чора ҳисобланади. Логистика муаммолари ва юқори нархлар туфайли бу йўл билан катта ҳажмда юк ташиш имконсиз.
Манбалар ушбу мавзуда очиқчасига гапиришга ваколати йўқлиги сабабли исмлари сир қолишини сўради. Россия Энергетика вазирлиги эса Reuters сўровига жавоб бермади. Соҳа мутахассисларининг маълумотларига кўра, Россия 2025-йилда қарийб 5 миллион тонна (кунига тахминан 117 минг баррел) бензин экспорт қилган эди.
Авиаёнилғи нархи рекорд даражага чиқдиБензин ва дизелдан ташқари, фуқаро авиацияси ҳам керосин топишга қийналмоқда. Мамлакатнинг бир нечта йирик аэропортларида самолётларга ёнилғи тўлдириш билан боғлиқ чекловлар жорий этилгани ҳақида хабарлар бор.
Улгуржи бозорда авиакеросин нархи рекорд даражага чиқиб, бир тоннаси 113 минг рублга (тахминан 1,2 минг доллар) етган. Бу март ойининг бошига нисбатан 52 фоизга юқоридир.
Россия Энергетика вазирлиги муаммони юмшатиш учун фавқулодда йиғилиш ўтказган. Шундан сўнг айрим авиакеросин тақчил ҳудудларга мамлакатнинг бошқа нуқталаридан ёнилғи етказилган. Шунингдек, 2026 йилнинг 30 ноябрь санасига қадар ушбу ёнилғи турининг экспорти тақиқланган.
