Жаҳон чемпионатининг 1-туридан ўрин олган учрашувлардан бири — Эрон ва Янги Зеландия ўртасидаги баҳс (2:2) якунлангач, Эрон бош мураббийи Амир Галенои матбуот анжуманида жамоасига нисбатан бўлаётган босимлардан норозилигини билдирди. Мураббийнинг таъкидлашича, Эрон терма жамоаси ўйин тугаши билан зудлик билан Лос-Анжелесдан чиқиб кетиб, Мексиканинг Тихуана шаҳридаги ўқув-машғулот базасига қайтишга мажбур қилинган.
Галенои жамоага ўйиндан кейин ҳордиқ чиқариш ва тикланиш учун етарли вақт берилмаганидан шикоят қилиб:
“Биз ҳавода жуда кўп вақт ўтказдик, ҳатто тикланишимизга ҳам вақт беришмади. Бугунги ўйиндан кейин эса бизга зудлик билан кетишингиз керак, дейишди. Бизга Тихуанадаги базага қайтишимиз кераклигини айтишди ва бу бизни жуда қийнамоқда”, деди Галенои.
Шунингдек, у ўз жамоасини “бутун жаҳон чемпионатидаги энг тазйиқ остидаги жамоа” деб атади. Жамоа сардори Меҳди Тареми эса Эрон футбол федерацияси президенти Меҳди Тож ва бошқа ёрдамчи ходимларнинг АҚШга кириши тақиқланганини тилга олиб: “Биз учун ҳаммаси ҳалокатли ҳолат”, деб баҳолади.
Маълумот ўрнида шуни таъкидлаш керакки, Эроннинг базаси мусобақа бошланишидан бир неча ҳафта олдин Аризона штатидан Мексиканинг Тихуана шаҳрига кўчирилган, ҳолбуки жамоанинг барча гуруҳ ўйинлари АҚШда ўтиши белгиланган эди.
