Ўзбекистон миллий терма жамоаси футболчиси Жалолиддин Машарипов жароҳат сабабли 2026 йилги Жаҳон чемпионати учун эълон қилинган 26 нафар футболчидан иборат якуний таркибдан чиқарилгани ҳақида хабарлар тарқалган эди.
Бугун, 11 июнь куни футболчилар расмий фотосессия маросимида иштирок этмоқда. Айни вақтда Америка Қўшма Штатларида жамоа билан бирга бўлиб турган спорт шарҳловчиси Даврон Файзиев ижтимоий тармоқдаги саҳифасида эълон қилган видеода “Sabah” клуби сафида Озарбайжон чемпионати ва Кубоги ғолиблигини қўлга киритган Умарали Раҳмоналиев 10-рақамли либосда кўриниш берди.
Маълумот учун, фотосессиялар йирик мусобақалар олдидан жамоаларнинг барча футболчилари ва бош мураббий иштирокида ташкил этилади ва ташкилий қўмитанинг расмий фото суратчиси томонидан амалга оширилади.
2 июнь куни ЎФА матбуот хизмати томонидан эълон қилинган ва 2026 йилги ЖЧда иштирок этувчи 26 нафар футболчидан иборат таркибда Машарипов 10-рақамда қайд этилган эди.
Маълум қилинишича, сўнгги ҳафталарда Жалолиддин Машариповни бел қисмидаги оғриқлар безовта қилган. Даволаш ва физиотерапия муолажалари орқали унинг ҳолати яхшилангани, бироқ жароҳат яна қайталаган.
Ўтказилган МРТ текшируви натижасида 33 ёшли футболчида умуртқалараро диск чурраси қайта зўрайгани аниқланган.
Аввалроқ терма жамоанинг мундиал учун якуний таркибида ўзгариш юз бергани ва Машарипов, ҳатто фаолиятини якунлаши мумкинлиги хабар қилинган эди.
